Topic: Baal Geet - Poems (Nepali)

[tundikhel]

मेरो सानो भाइ



                    -हरिहर तिमिल्सिना

तातेताते गर्दै हिँड्छ मेरो सानो भाइ
किताब र कापी देऊ भन्छ पढ्नलाई
तोतेतोते बोली बोल्छ बोल्नै जान्दैन
मलाई छोडी अन्त जान मान्दै मान्दैन ।

दूधलाई 'बुबु' भन्छ भातलाई माम
'भोक लागे' निद्रा लागे रुने उसको काम
नाम्लो नाना ल्याइदेऊ भन्छ सहर गई
आमासित नुनु गर्छ सधैँ ज्ञानी भई ।

सुरी आयो भनेदेखि खुबै डराउँछ
सानो पपी कुकुरदेखि निकै रमाउँछ
पापाचाचा ल्याऊ भन्छ, हात हल्लाउँदै
टीँटीँ गर्छ खेलौनाको मोटोर चलाउँदै ।

[tundikhel]

कानाकाना कुर्र


                                _दैवज्ञराज न्यौपाने

कानाकाना कुर्र
नाना दौड्यो खुर्र
चरी उड्छ भुर्र
कानाकाना कुर्र

    माथि बादल भाग्यो
    तल घाम लाग्यो
    बतास चल्छ हुर्र
    कानाकाना कुर्र

फूल राम्रो बेली
यस्तै खेल खेली
मन हुन्छ फुर्र
कानाकाना कुर्र

[tundikhel]

रिस


            _माधवप्रसाद घिमिरे

हेर्दै हाँसो उठ्छ
हासूँ भने कुट्छ

    रिस उफ्र्‍यो बुर्लुक्क
    आखाँ गेडी पिर्लिक्क
    बल्ड्याङ्ग्राको बिर्लिक्क

मुखै काच्चकुच्च
हेर्दै हाँसो उठ्छ

    पाखुरा आफ्नै सुर्की
    बङ्गारा आफ्नै मुर्की
    कल्लाई लाउँछ घुर्की

दाँतै ङाच्चङिच्च
हेर्दै हाँसो उठ्छ

    बोली कति चर्को
    भाडाँ-कुँडा थर्क्यो
    ढोडनसो तर्क्यो

गाली पाच्चपिच्च
हेर्दै हासोँ उठ्छ

    पसिनाको खलबल
    आन्द्राभुँडी गलबल
    आँत जली जलजल

फिँज गाज्जगुज्ज
हेर्दै हाँसो उठ्छ

[tundikhel]

घाम झुल्क्यो


                    -किष्णप्रसाद पराजुली

घाम झुल्क्यो पूर्वबाट
डाँडामाथि राम्रो
आऊ भाइ, आऊ बैनी !
पालो आयो हाम्रो

    आज दिनमा धेरै-धेरै
    काम गर्नुपर्छ
    नढल्किँदै घाम भरे
    घरमा फिर्नुपर्छ

अरु साथीभाइभन्दा
अघि पुगौँ हामी
कामकुरा राम्रो गरी
बन्न खोजौँ नामी

    घाम झुल्क्यो पूर्वबाट
    हिमचुलीमा छुँदै

    हामी हिँडौँ,हामी हिडौँ
    घामजस्तो हुदैँ ।

[tundikhel]

गाइने दाइ



    गीत गाउने गाइने दाइ

एउटा गीत सुनाइदेऊ हामीलाई ।।२

    गाउँघर घुम्दै फिर्दै

गीत गाउँछौ तिमी ।

    सारङ्गीको धुनसँगै

टाढा पुग्छौ तिमी ।।

    केटाकेटी बुढाबुढी

सबै तिम्रा साथी ।

    यो माटाका सुखदु:ख

सबै तिम्रा साथी ।। गीत गाउने.............।२

    हामी साना केटाकेटी

तिम्रो गीत सुन्छौँ ।

    यो देशका सबै कुरा

मनमनै गुन्छौँ ।।

    खुसी भैइ हिँड्छौ तिमी

गाउँघर डुल्दै ।

    नेपालीका सुखदु:ख

सारङ्गीमा भर्दै ।।

गीत गाउने.............।२

[tundikhel]

सवाल जवाफ


                दुर्गालाल श्रेष्ठ

चरा, किन ठुङ्छौ
पिँजराको डन्डी
मन पर्दैन कत्ति मलाई
यस्तो घेराबन्दी ।

    यो त घर बुट्टेदार
    हेर, कति झ्याल?
    तर यहाँ देख्छु म ता
    ज्युँदै आफ्नो काल ।

खानलाई दाना छ नि
प्युनलाई पानी ?
जिन्दगानी दानापानी
मात्र होइन नानी ।

    कसो गरे हुन्छ तिम्रो
    जिन्दगानी आकाश अँगालेर
    सिङ्गै आकाश अँगालेर
    हिँड्ने बानी हाम्रो ।

[winkantipur]

Really good collection i had a copy...